Acts 26
Póro anondá simátímakain-kwasai.
1súwana Ágárípa Pórontavai séna ánivo simánkaraan-aimba anondá simátimiyo súwana Póro ayáámba mósá tuwéna simánkaron-ainkomba anondá síndayavena séna 2kentáásí anóndako Ágárípaao Yútaa-kwaasi simásínkaraan-aimba enaúrankaꞋa anondá sénaundayavai sirunkó aamoí kwéiye. 3Yútaa-kwaasiti ááinkwara ámáánkwaraꞋa kaweꞋá umái kwéisaandayavai sirunkó kaweꞋá kwéintavai íma sívón-kaiyé sé kesáái kaweꞋá umái isáníyone. 4kemá iyámpóírakemba kesí Yútaa-kwaasivimba méꞋa YérúsaremuvaꞋa koméꞋa kemó ówándawaina ááimba Yútaa-kwaasi amápaꞋa suwánaraawe. 5ámáán-kawaa-kwaasiti aampaꞋá arupí umái kuráumne. ámáán-kawaa-kwaasi Áánútuna imáyáaya éta asirayán-ámpátá kwégwareta minámpáꞋá arupí umái kuráumne. Yútaa-kwaasi ayáátáákaꞋa suwánaraamba pósa sésáinasamo ésa kentáváí áraiꞋa siyé sénááowe. 6naaóváꞋá Áánútu kentáá síkwáꞋnáyavai árair-aimba simátímakomba paáríníntavai amuꞋmakáumnemo siráunda-aintavai aaivimbá maisínkaraawe. 7kentáá síkwáꞋná sísamaivakemba kaeꞋá kumbaimái-kwaasivinkemba Yútaa-kwaasi noꞋwáámba aaváyaavimba eénáínkaꞋa Áánútuna imáyáa mósá kwémaresa mináráír-áímbá amuꞋmáráantemba mirá kwéundayavai aaivimbá maisínkaraawe. 8Yútaa-kwaasiyono. Áánútu kwaási pukémpinkemba kanaán-umai usásintinkaniye-aintavai nóra isará íma áraire kwéseo.9ááéma kemá imáyáa éꞋa Ísu Násáretivakewaina aampaꞋá kwégowai sáwíꞋa umátinkanaumne-imayaa uráumne. 10YérúsaremuvaꞋa mirá ówánana mono-káwáá-kwáásí siꞋmárówaꞋa Áánútuna kwaási sáwívarawai tíꞋmai ándávaꞋa tínkaraawanasa tínkamiyasa púwóro sumbá kegwáráꞋá mirán-oro siráumne. 11aasiyaasi-táwai monoꞋ-náúmpímpáꞋá kwénaaeꞋa Ísun-aai simái sáwíꞋa ígwáe séꞋa tínkambaeꞋa iráumne. sirunkó ikaaꞋá vówaꞋa némpaꞋ-naopimpakwaraꞋa kwénaaeꞋa tínkambaeꞋa kuráumne.
12anóndako Ágárípaao mindáyavai mono-káwáá-kwáásí aúvái agaimái simúwaꞋa Támásikasi-naopaꞋa maimaéꞋa kówánda 13kwáyáꞋwái ságayamba aaváúgómbó usáyaatarai-sagayamba tuwówana kwíyómpakemba kuména kesinepakéné kesé kun-kwáásí tinepakéné sán-kówata 14marapátá tuvamówánanaya aaiyé suꞋmai súwaꞋa isááwánana simásimena Yútaa-kwaasi tááivinkemba séna Sóroo nóintavai kembá sáwíꞋa kwéono. póímo ándámo kwímakaawanamo ayáámbo kawésíntemba emá mirá kwéone súwana 15Ísóigoo nááwaꞋono séwánana Ísóigo séna kembá Ísumba sáwíꞋa kwéumasinkaanaꞋa úne. 16usásinaao. kesí mayáí mayáínkwáe séꞋa usásinankeꞋa enaúrankaꞋa paárúnda ívéꞋo suwánáándarakemba agarááránkáanda-aimba simátímaꞋmae iyíníyone. 17aiꞋmáráana Yútaa-kwaasiye óꞋonkaa-kwaasiye simátímínasa évakaꞋa áwááꞋo aíyaꞋa miwí tiyáámpinkemba airánaumne. 18simátímínasa túnín-ampaꞋa ivátuwesa sámo kain-ámpáꞋá teró. Sáátáánigona asirayámbá tuwésa Áánútuna asirayámbá tamáyáaro. simátímínasa kesááiyavesa áraire sésa aráápamai maíyaꞋa miwítí sáwí-imayaa maitiyuwéꞋa Áánútundei-iꞋa umátinkaunda-kwaasivimba mótinkanaumne Ísu simásímakaiye.
19anóndako Ágárípaao kwíyómpakemba simásímakain-aimba íma tuwéꞋa úwoi mirá kwéune. 20aivaꞋá Támásikasi-naopaꞋa simátimeꞋa naaémba YérúsaremuvaꞋa simátimeꞋa minkákémbá Yútaa-kwaasiti maraváꞋá simátimeꞋa óꞋonkaa-kwaasiti maraváꞋá simátimeꞋa séꞋa kentí sáwí-imayaa tuwéꞋa ÁánútumpaꞋa téꞋa kaweꞋ-máyáí mayáíyasa tuwánésa sésa ÁánútumpaꞋa tiráawain-owe sígwáe séꞋa simátímaꞋmaeꞋa kuráumne. 21mindáyavai anóm-bonoꞋ-naumpaꞋa máyaawandaraꞋa Yútaa-kwaasi kembá tátokesa tuvuwónáe siráambanivo 22Áánútu súwaꞋnaa úmaena ívékwaraꞋa kwéiyisaꞋa maankáꞋá méꞋa anón-kwaasiye úwoi-kwaasiye kesáái kwésimatimeꞋa Áánútun-aai simátímakowai agaimakáan-aimba Mósesi agaimakáin-aimba kwésimatimunda-aimba mimbórá-áímbá kwésimatimune. 23maará sésa Áánútumo usásinankaiwaiyavesa agaimarésa sésa áíꞋa índaiꞋa íyana aivaꞋnáꞋá pukáimpinkemba usásinankaniye-aimba agaimakáamba pósa Yútaa-kwaasiye óꞋonkaa-kwaasiye pukáimpinkemba usásinkain-aimba isésa sámo kain-ámpáꞋá kwígwáe sésa agaimarésamo siráan-aimba kemá kwésimatimune Póro siráiye.
24Pórombo simánkaraan-aimba anondá kwésimatimuwana Vésétasi anónkaꞋa séna Póroo uwoaóꞋá kwéone. aúváíma awánamae kwéiye po uwoaóꞋá kwéone Vésétasi súwana 25Póro séna anóndakoo íma uwoaóꞋá kwéumpo súnda-aimba árair-aimba arupí-aimban-iye. 26súnda-yantaaꞋa íma aúpáꞋá uráavo amápa-kwaasi táápimba siráamba egwáráꞋá mináímbá ísaraampo kemá íma inkaiséꞋa úwoi kwésimamune. 27Áánútun-aai simátímakowai tááiyavai áraire kwéseno. árairemo kwésemba áꞋa ísaraumne Póro súwana 28Ágárípa séna ákí-aimba simásimenda-imayaa e Ísun-aaiyavai áraire sénaumne-imayaa oónó súwana 29Póro séna íma ákí-aintavai íma ayáátáár-aintavai kwésune. kembó asááuraan-andaoma íma keinárawapimba kwaínkwáe kwésundanivo Ísun-aaiyavai áraire siráundantemba kesáái kwéisaan-kwaasiye esé mirá sénááontavai ÁánútumpaꞋa námúnaa kwésune Póro siráiye.
30súwasa Ágárípaawe Vésétasiye Pénáisiye amápa-kwaasiye usásinesa 31mááꞋaruvaꞋa kumbésa keáímbá sésa íma sáwíꞋa uráintavai ándávaꞋa ankésa tuvuwíyana puwíno siráawe suwaná 32Ágárípa Vésétasintavena séna Árómáani-kamaani-aiva-kawaanakonopaꞋa kónaumne ímo siráinkakai ayúrankaanana kówisina mináímbá siráimba po aiꞋmárénana Árómáani-kamaani-aiva-kawaanakonopaꞋa kwíno Ágárípa siráiye.
Copyright information for
KZE